vicebskreg.by

Информационный портал

Социальные сети:

Новости Витебского региона Общество

24.01.2021 12:02

233 просмотра

0 комментариев

Студэнтак ВДМУ пакаралі за акцыю салідарнасці: Паліна Нітчанка — 10 сутак арышту, Анастасія Лявонцьева — штраф

Суд Кастрычніцкага раёну Віцебску 22 студзеня вынес рашэнне ў адміністрацыйнай справе паводле арт.23.34 КаАП у дачыненні да студэнтак 2-га курсу ВДМУ Паліны Нітчанкі і Анастасіі Лявонцьевай.

Суддзя Уладзімір Царыкаў прызнаў удзел дзяўчат у не дазволеным уладамі пікетаванні даказаным і пакараў Паліну Нітчанку 10-цю суткамі арышту, Анастасію Лявонцьеву – штрафам у памеры 16 базавых велічынь.

14 снежня шэсць студэнтак на пятым паверсе будынку ВДМУ правялі акцыю ў падтрымку зняволеных навучэнцаў ВНУ. Дзяўчаты сфатаграфаваліся, трымаючы ў руках бел-чырвона-белы сцяг і плакаты з надпісамі: «Свабоду Яну Салановічу!», «Свабоду палітзняволеным студэнтам!».

Паводле пратаколу, Нітчанка і Лявонцьева (астатніх удзельнікаў акцыі міліцыя не ідэнтыфікавала) «ўзялі ўдзел у несанкцыянаваным пікетаванні з мэтай публічнага выказвання сваіх асабістых інтарэсаў»э

Адзначым, што Паліна Нітчанка мусіла 22 студзеня вызваліцца з віцебскага ізалятару часовага ўтрымання (ІЧУ), дзе адбывала пакаранне арыштам на 7 сутак за ўдзел у відэазвароце студэнтаў да ўладаў, але на волю так і не выйшла: міліцыя затрымала яе па іншай справе. У працэсе дзяўчына ўдзельнічала праз відэасувязь па скайпе.

Анастасія Лявонцьева ад свайго ўдзелу ў пратэставай фотасэсіі не адмовілася. Але паведаміла, што, акрамя сваёй сяброўкі Паліны, іншых удзельнікаў акцыі не ведае. Спаслалася таксама на арт. 33 Канстытуцыі, які гарантуе ёй «свабоду меркаванняў, перакананняў і іх свабоднае выказванне».

Нітчанка ж заявіла на судзе, што нічога, акрамя экзамену, здадзенага ёй у той дзень, не памятае. Сябе на прадэманстраваным фота не пазнала.

Капітан Кастрычніцкага РАУС Віталь Праліч, які праводзіў праверку і рыхтаваў дакументы для перадачы ў суд, патлумачыў, што Паліну Нітчанку на фота апазнаў ён, бо ведаў яе раней. Апазналі дзяўчыну і намеснікі дэкана універсітэту Святлана Казлоўская, Яраслаў Перавалаў і загадчыца інтэрнату №2 Валянціна Свірыдзенка.

Даследаваўшы матэрыялы справы, суддзя Уладзімір Царыкаў прыйшоў да высновы, што факт удзелу 14 студзеня Лявонцьевай і Нітчанкі ў несанкцыянаваным пікетаванні знайшоў сваё пацверджанне. Пастанавіў аштрафаваць Анастасію Лявонцьеву на 16 базавых велічыняў (464 рублі), а Паліну Нітчанку пакараць адміністрацыйным арыштам на 10 сутак. Такім чынам, Паліна агулам правядзе за кратамі віцебскага ІЧУ 17 сутак.

С. Горкі, "Віцебская вясна"

Последние новости