vicebskreg.by

Информационный портал

Социальные сети:

Новости Витебского региона Происшествия

05.01.2021 13:47

195 просмотров

0 комментариев

Суд Віцебскага раёну паўторна разгледзеў адміністрацыйную справу ў дачыненні 19-гадовай Ангеліны Туравец

Яе вінавацілі ва ўдзеле ў маршы памяці Рамана Бандарэнкі (ч.3 арт. 23.34 КаАП) 15 лістапада.

Суддзя Наталля Траццякова прызнала дзяўчыну вінаватай і пакарала штрафам у памеры 40 базавых велічынь.

«Ці справядліва пакаралі? Канечне, не! Я проста гуляла з сяброўкай... Яны думаюць, што штрафамі ды суткамі напалохаюць нас. Але я працягну гуляць і надалей», – сказала пасля суду Ангеліна Туравец.

23 лістапада Ангеліна Туравец, якая на той момант знаходзілася пад вартай у СІЗА, была прызнаная ў гэтай жа справе невінаватай (суддзя Міхаіл Зубеня). Але начальнік Віцебскага РАУС Андрэй Іваноў абскардзіў тое рашэнне ў абласным судзе, у выніку справу накіравалі на новы разгляд. Разбірала яе гэтым разам суддзя Наталля Траццякова.

Паводле пратаколу, Ангеліна Туравец 15 лістапада ўзяла ўдзел у несанкцыянаваным вулічным шэсці з мэтай выказвання пратэсту супраць парадку правядзення выбараў і гвалту. Сваёй віны дзяўчына не прызнала. Патлумачыла, што проста гуляла па вуліцы Леніна разам з сяброўкай.

На міліцэйскім відэа Ангеліна знаходзілася на пэўнай дыстанцыі ад калоны пратэстоўцаў. Тым не менш, суддзя палічыла, што чалавек, які да гэтага 4 разы прыцягваўся да адміністрацыйнай адказнасці паводле арт. 23.34, не мог выпадкова апынуцца ў месцы правядзення акцыі пратэсту.

Суддзя прызнала Ангеліну Туравец вінаватай і пакарала яе штрафам у памеры 40 базавых велічынь (1160 рублёў).

Сапраўды, пасля прэзідэнцкіх выбараў Ангеліну Туравец да гэтага 4 разы прыцягвалі да адміністрацыйнай адказнасці паводле арт. 23.34. Яе каралі штрафамі і адміністрацыйнымі арыштамі. Агулам у віцебскім СІЗА дзяўчына правяла 10 сутак. На сённяшні суд таксама прыходзіла з так званым «камплектам для СІЗА» ў заплечніку.

Зміцер Міраш, "Віцебская вясна"

Последние новости