Праваабаронцы накіравалі Паўла Левінава для працы ў штаб па барацьбе з COVID-19
6 красавіка Грамадзкі камітэт упаўнаважаных па правах чалавека «Правы для ўсіх» прыняў рашэньне накіраваць праваабаронцу Паўла Левінава для ўдзелу ў працы абласнога штабу па барацьбе з распаўсюдам каронавірусу. З гэтай нагоды даслалі ў Віцебскі абласны камітэт электронны зварот з просьбай уключыць кандыдатуру Левінава ў склад штабу.
«Павал Левінаў зладзіў збор сродкаў для прадухіленьня распаўсюду каронавірусу ў Віцебскай вобласьці і па меры магчымасьці забясьпечвае мэдычныя ўстановы вобласьці сродкамі індывідуальнай засьцярогі. Просім тэрмінова паведаміць аб прынятым рашэньні», — гаворыцца ў звароце.
10 красавіка быў атрыманы адказ. Намесьнік старшыні Віцебскага аблвыканкаму Ўладзімер Пенін паведаміў, што зварот «быў пакінуты без разгляду па сутнасьці, бо не ўтрымлівае адрас месца жыхарства заяўніка, а таксама да звароту не прыкладзеныя электронныя копіі дакумэнтаў, якія б пацьвярджалі паўнамоцтвы заяўніка». Чыноўнік спаслаўся пры гэтым на Закон «Аб зваротах грамадзян і юрыдычных асобаў».
Сьвецік: Калі адмовяць — будзе створаны грамадзкі штаб
Сябра простага таварыства ГКУПЧ «Правы для ўсіх» праваабаронца Леанід Сьвецік лічыць, што ўлады проста ня хочуць прымаць на гэты конт якога-небудзь рашэньня. Каб не даваць канкрэтнага адказу — прыкрываюцца фармальнымі недахопамі ў звароце.
«Але мы мусім ведаць канкрэтную — „так“ ці „не“? — пазыцыю аблвыканкаму, каб разумець, што рабіць далей. Калі „не“ і нашага прадстаўніка ня ўключаць у склад афіцыйнага штабу — то ў бліжэйшым будучым будзе створаны грамадзкі штаб па барацьбе з распаўсюдам COVID-19», — паведаміў Левнід Сьвецік.
11 красавіка праваабаронцы Грамадзкага камітэту ўпаўнаважаных па правах чалавека «Правы для ўсіх» накіравалі чарговы зварот з просьбай аб разглядзе кандыдатуры Паўла Левінава ў якасьці сябра абласнога штабу па барацьбе з распаўсюдам каронавірусу.
Гэтым разам зварот адрасавалі на імя старшыні Віцебскага аблвыканкаму Мікалая Шарстнёва. Адказу пакуль няма.
Зьміцер Міраш
https://vitebskspring.org